VENDIM

Nr.331, datë 25.3.2009

PëR NDARJEN në nivele, brenda kategorive, të personelit akademik, në institucionet e arsimit të lartë, emërtimin e renditjen e tyre, si dhe kriteret dhe kualifikimet për secilin vend pune

Në mbështetje të nenit 100 të Kushtetutës dhe të neneve 47, pika 3, e 93, të ligjit nr.9741, datë 21.5.2007 “Për arsimin e lartë në Republikën e Shqipërisë”, të ndryshuar, me propozimin e Ministrit të Arsimit dhe Shkencës, Këshilli i Ministrave

VENDOSI:

KREU I

NDARJA Në NIVELE, BRENDA KATEGORIVE, Të

PERSONELIT AKADEMIK

1. Kategoritë e personelit akademik ndahen në nivele, të cilat emërtohen e renditen sipas përcaktimeve të këtij vendimi. Ndarja në nivele bëhet për shpërndarjen e personelit akademik në institucionet e arsimit të lartë, sipas vendeve të punës, që ka çdo njësi, mbështetur në veprimtaritë, që do të zhvillojë dhe kualifikimin e kërkuar.

2. Kategoria “Profesor” përfshin personelin akademik, i cili është titullar lëndësh ose modulesh e udhëheqës i veprimtarisë së kërkimit shkencor dhe përbëhet, përkatësisht, nga nivelet a/1 “Profesori” dhe a/2 “Profesori i asociuar”,

2.1 Niveli a/l “Profesori”:

a) i cili është titullar i disiplinave/moduleve, në programe studimi, kryesisht të ciklit të dytë e të tretë, dhe i komisioneve të provimeve, në të gjitha ciklet e studimeve, udhëheq studentët në përgatitjen e tezave të diplomave, në të gjitha ciklet e studimeve, drejton hartimin e dokumentacioneve kryesore, shkollore dhe kurrikulare;

b) drejton veprimtaritë e kërkimit dhe të transferimit të teknologjive, drejton grupin kërkimor, udhëheq tezat e doktoratës, për përgatitjen e kërkuesve të rinj etj;

c) merr pjesë aktive në drejtimin dhe zhvillimin e institucionit të arsimit të lartë e të njësive të tij, si dhe jep ndihmesë profesionale, për çështjet e arsimit e të shkencës, në shkallë vendi.

2.2 Niveli a/1 kërkon personel akademik, me titullin “Akademik” ose “Profesor”, i cili e ushtron veprimtarinë mësimore e kërkuese në institucionet e arsimit të lartë.

2.3 Niveli a/2 “Profesori i asociuar”:

a) i cili është titullar i disiplinave/moduleve e i komisioneve të provimeve, në të gjitha ciklet e studimeve, udhëheq studentët në përgatitjen e tezave të diplomave të studimeve, të ciklit të parë dhe të dytë, merr pjesë në hartimin e dokumentacioneve kryesore, shkollore e kurrikulare, dhe në drejtimin e procesit mësimor;

b) kryen veprimtari të pavarura të kërkimit shkencor, të zhvillimit dhe transferimit të teknologjive e njohurive dhe jep ndihmesën e vet në përgatitjen e kërkuesve etj;

c) mund të jetë edhe udhëheqës i tezave të doktoratës, kur këshilli i profesorëve të fakultetit jep pëlqimin, mbështetur në veprimtarinë akademike të udhëheqësit dhe në natyrën e temës së disertacionit të doktoratës, që propozohet;

ç) merr pjesë në drejtimin dhe zhvillimin e institucioneve të arsimit të lartë dhe të njësive të tij, si dhe ofron ndihmesë profesionale, për çështjet e arsimit dhe shkencës, në shkallë vendi etj.

2.4 Niveli a/2 kërkon personel akademik, me titullin “Profesor i asociuar”, i cili e ushtron veprimtarinë mësimore e kërkuese në institucionet e arsimit të lartë.

3. Personeli akademik, me titullin “Profesor emeritus”, përbëhet nga personel akademik, i dalë në pension, me kontribute të spikatura në mësimdhënie, kërkim apo në shërbim të institucionit dhe që e ka fituar këtë titull, në përputhje me përcaktimet në aktet e tjera nënligjore. Ky personel ftohet në institucionet e arsimit të lartë për elemente të veçanta të veprimtarisë, të përmendura më sipër në këtë vendim, si detyra të nivelit a/l e a/2.

4. Kategoria “Docentë” përfshin personelin akademik, që zhvillon, kryesisht, veprimtari mësimore dhe ka titullin “Docent” ose gradën shkencore “Doktor”. Kjo kategori përbëhet, përkatësisht, nga nivelet b/1 “Docenti”, b/2 “Lektori i parë”/ “Kërkuesi i parë”.

4.1 Niveli b/1 “Docenti” kryen këto veprimtari:

a) jep mësim, në mënyrë të pavarur, në të gjitha programet e studimit, të ciklit të parë dhe të dytë, si dhe, nën drejtimin e personelit akademik, të nivelit a/1 e a/2, në programet e studimit të ciklit të tretë. Ai mund të jetë anëtar në komisionet e provimeve, në të gjitha ciklet e studimeve, si dhe udhëheqës i studentëve në përgatitjen e tezave të diplomave, të ciklit të parë dhe të dytë të studimeve;

b) harton programe mësimore të studimit të ciklit të parë, merr pjesë në hartimin e programeve mësimore studimi të ciklit të dytë e të tretë dhe për zhvillimin e teknikave e të teknologjive të reja në mësimdhënie etj;

c) merr pjesë në programe kërkimi, zhvillimi dhe transferimi të teknologjive e njohurive, në botime profesionale dhe të mësimdhënies etj;

c) merr pjesë në drejtimin dhe zhvillimin e institucionit të arsimit të lartë e të njësive të tij, në udhëheqje e këshillim karriere, për grupe studentësh, etj.

4.2 Niveli b/1 kërkon personel akademik me titullin “Docent”, që e ushtron veprimtarinë në institucionet e arsimit të lartë.

4.3 Niveli b/2 “Lektori i parë” / “Kërkuesi i parë” kryen këto veprimtari:

a) jep mësim, në mënyrë të pavarur, në programe të studimit, të ciklit të parë e të dytë, harton dokumentacionet e programeve të studimit e të programeve disiplinore etj.;

b) merr pjesë në programe e projekte kërkimore, të zhvillimit dhe të transferimit të teknologjive, në kërkim të pavarur, në botime shkencore dhe profesionale etj;

c) merr pjesë në drejtimin dhe zhvillimin e institucionit të arsimit të lartë e të njësive të tij në tutorët e këshillim karriere, për grupe studentësh etj.;

4.4 Niveli b/2 kërkon personel akademik, me gradën shkencore “Doktor”, që e ushtron veprimtarinë në fakultete, dhe quhet “Lektor i parë” ose në institute e qendra kërkimi dhe zhvillimi, dhe quhet “Kërkues i parë”.

4.5 Ky nivel zbatohet edhe për personelin akademik, të punësuar në drejtimet e studimeve universitare, në fushën e shëndetësisë, i cili ka kryer studimet specializuese afatgjata dhe ka, së paku, 2 vjet përvojë pune si specialist në fushën përkatëse.

5. Kategoria “Lektorë” përfshin personelin akademik, që zotëron një diplomë “Master i nivelit të dytë” (MND) ose “Magistër”, ose ekuivalentin e këtyre kategorive, të fituar jashtë vendit dhe të njohur nga Ministria e Arsimit dhe Shkencës, në fushë të njëjtë ose të përafërt.

5.1 Kalegoria “Lektorë” për fushat e krijimtarisë në arte përfshin edhe personelin akademik, që zotëron një diplomë të studimeve universitare, të modelit të vjetër, të ekuivalentuar sipas përcaktimeve të bëra në paragrafin e tretë të nenit 89 të ligjit nr.9741, datë 24.5.2007 “Për arsimin e lartë në Republikën e Shqipërisë”, të ndryshuar, i cili, pas përfundimit të studimeve dhe në vazhdim dëshmon se ka një veprimtari të spikatur artistike, të certifikuar të tillë nga personalitetet e fushës dhe organet e autoritetet drejtuese të Akademisë së Arteve.

5.2 Kategoria “Lektorë” përbëhet nga niveli: c/1 “Lektori”/ “Kërkuesi”, i cili kryen këto veprimtari:

a) jep mësim në programe të studimit universitar të ciklit të parë dhe në programe të studimit jouniversitar, merr pjesë në hartimin e dokumentacioneve kurrikulare të programeve të studimit të ciklit të parë, nën drejtimin e personelit akademik, të niveleve a/l, a/2 dhe/ose b/1, b/2, si dhe në procese të tjera, të cilat përputhen me formimin e tij etj;

b) jep mësim nën drejtimin e personelit akademik, së paku, të një kategorie mbi të, në programet e studimit në ciklin e dytë (DND) ose, në mënyrë të pavarur, në MNP;

c) merr pjesë në projektet kërkimore të institucionit, në programet rajonale të zhvillimit dhe transferimit të teknologjive etj.;

ç) merr pjesë në komisione provimesh, në monitorime, tutorët dhe këshillim karriere, për studentë e grupe studentësh etj.

5.3 Niveli c/1 e ushtron veprimtarinë në fakultete, dhe quhet “Lektor” ose në institute e qendra kërkimi dhe zhvillimi, dhe quhet “Kërkues”.

6. lnstitucionet e arsimit të lartë mund të punësojnë edhe studentë, që janë në procesin e kryerjes së studimeve të doktoratës e të përgatitjes së disertacionit, për gradën shkencore “Doktor”, për të mbështetur profesorin udhëheqës të disertacionit në procesin mësimor. Kjo kategori nuk mund të vlerësohet personel akademik i brendshëm i institucionit. Ngarkesa mësimore e këtyre studentëve duhet të jetë jo më shumë se 25 për qind e asaj të përcaktuar për nivelin e lektorit, me qëllim që të mos ta pengojë atë në përgatitjen e disertacionit.

7. Personeli akademik, i punësuar në institucionet publike të arsimit të lartë, sipas përcaktimeve të bëra në këtë vendim, përparon në karrierë, mbështetur në kualifikimet dhe në vlerësimet pozitive në punë.

7.1 Kalimi nga një kategori në një tjetër bëhej me kërkesë, me shkrim, dhe përkundrejt procedurave të konkurrimit për atë vend pune.

7.2 Kalimi nga një nivel në një nivel më të lartë, brenda kategorisë, dhe nga një kategori më e ulët në një tjetër më të lartë, të personelit akademik, bëhet kur institucioni ka vend të lirë për këtë nivel dhe kandidati ka kualifikimet e nivelit përkatës dhe ka marrë vlerësim pozitiv për punën e bërë nga këshilli i fakultetit. Këto vlerësime kryhen çdo 2 (dy) vjet.

KREU II

RIORGANIZIMI I PERSONELIT AKADEMIK ME VENDET E REJA Të PUNëS, Në INSTITUCIONET E ARSIMIT Të LARTë

1. Personeli akademik, i cili në vitin akademik 2008-2009 nuk do të ketë shkallën e kualifikimit, sipas përcaktimeve të bëra në këtë vendim, do të mbajë një vend pune, që i afrohet më shumë kualifikimeve të tij, me detyrimin që, brenda një periudhe 5-vjeçare, nga hyrja në fuqi e ligjit nr.9741, datë 21.5.2007, të ndryshuar, të kualifikohet, sipas kërkesave të vendit të punës.

1.1 Personeli akademik, i punësuar aktualisht në institucionet publike të arsimit të lartë, ka përparësi ndaj kërkesave të kandidatëve të tjerë, në kuotat, që miratohen për programe studimi “Master i nivelit të dytë” dhe doktoratë.

2. Institucionet e arsimit të lartë nuk mund të klasifikojnë në kategoritë “Profesorë” dhe “Docentë” anëtarë të personelit akademik, të punësuar në institucion, të cilët nuk përmbushin kriteret përkatëse të kualifikimit, shkencor e pedagogjik, të vendit të punës.

3. Në nivelin c/1 “Lektori” apo “Kërkuesi” kalojnë anëtarët e personelit akademik, me një diplomë të marrë në studime të thelluara pasuniversitare, të ekuivalentuara, sipas përcaktimeve të bëra në paragrafin e tretë të nenit 89 të ligjit nr.9741, datë 21.5.2007 “Për arsimin e lartë në Republikën e Shqipërisë”, të ndryshuar.

3.1 Në nivelin c/1 kalojnë edhe anëtarët e personelit akademik, që kanë një diplomë të nivelit të dytë, diplomë të integruar të nivelit të dytë ose një diplomë të studimeve universitare, të modelit të vjetër, të ekuivalentuar, sipas përcaktimeve të bëra në paragrafin e dytë të nenit 89 të ligjit nr.9741, datë 21.5.2007, të ndryshuar, maksimumi deri në përfundim të afatit të përcaktuar në pikën 1 të këtij kreu.

4. I gjithë personeli akademik me titullin “Profesor”, aktualisht i punësuar në institucionet publike të arsmit të lartë, gëzon të drejtën e vendit të punës të nivelit a/1.

4.1 Vendet e punës, të zëna nga personeli akademik, që, në ditën e hyrjes në fuqi të këtij vendimi, kanë arritur moshën 60 vjeç për meshkujt dhe 55 vjeç për femrat, nuk shpallen e rishpallen për konkurrim. Ky personel ka të drejtë ta ruajë, deri në daljen në pension, vendin e punës, në kategorinë dhe nivelin që do të klasifikohet, në bazë të këtij vendimi, pa zbritur nga paga që ka gëzuar deri në atë çast.

4.2 Për të tërhequr personel akademik me kualifikimin e nevojshëm, institucionet e arsimit të lartë duhet të shpallin, para fillimit të çdo viti akademik, të gjitha vendet e punës, të zëna nga personeli akademik, i punësuar me kontratë të përkohshme, por që nuk përmbush kriteret përkatëse të kualifikimit, shkencor e pedagogjik, të vendit të punës.

5. Vendet e lira të punës, në institucionet publike të arsimit të lartë, shpallen, si rregull, në muajin qershor të çdo viti.

6. Në kuadër të strategjisë për thithjen e trurit, “Brain gain”, Ministria e Arsimit dhe Shkencës dhe institucionet publike të arsimit të lartë parashikojnë të kenë, çdo vit, kuota për vende të lira pune, për të emëruar ose riemëruar në këto institucione, në çdo kohë, personel akademik, i cili:

6.1 ka përfunduar me vlerësim, me notë mbi mesataren, studimet e doktoratës dhe ka mbrojtur gradën shkencore “Doktor” ose “Ph.D.”, në universitete të huaja, të akredituara nga agjenci ose organizma, të njohura në shkallë ndërkombëtare;

6.2 pas përfundimit të studimeve të doktoratës, ka qenë i punësuar në profesion në një universitet perëndimor a qendër kërkimore;

6.3 pas studimeve të doktoratës në Shqipëri, ka përfunduar studime postdoktorale, të paktën njëvjeçare, në një universitet a qendër kërkimore perëndimore të akredituar nga agjenci, të njohura në shkallë ndërkombëtare.

7. Personeli akademik i kategorisë “a” (pika 2, kreu I) punësohet me kontratë, me afat të pacaktuar, në institucion.

8. Ministri i Arsimit dhe Shkencës nxjerr udhëzim për kategoritë e personelit ndihmës, mësimor e shkencor, të institucioneve të arsimit të lartë dhe përshtatjen e tyre me kategoritë e personelit akademik.

9. Institucionet private të arsimit të lartë e kryejnë vetë riorganizimin e personelit akademik, por duhet, në çdo rast, të respektojnë kriteret dhe kualifikimet e kërkuara për secilin vend pune, në institucionet e arsimit të lartë, të përcaktuara në kreun I të këtij vendimi. Ato duhet ta punësojnë personelin akademik, në përputhje me nivelin e arsimimit, që ofrojnë në institucion.

10. Ngarkohen Ministria e Arsimit dhe Shkencës dhe institucionet e arsimit të lartë për zbatimin e këtij vendimi.

Ky vendim hyn në fuqi pas botimit në Fletoren Zyrtare.

Kryeministri

Sali Berisha